Mat 11 | Ndebele | STEP | Kwasekusithi uJesu eseqedile ukulaya abafundi bakhe abalitshumi lambili, wasuka lapho ukuyafundisa lokutshumayela emizini yabo.

2 Kwathi uJohane ^a esentolongweni esezwile imisebenzi kaKristu, wathuma ababili babafundi bakhe ^b, 3 wathi kuye: Wena unguye ozayo yini, kumbe silindele omunye? 4 UJesu wasephendula wathi kubo: Hambani limtshele uJohane izinto elizizwayo lelizibonayo ^c: 5 Iziphofu zibuye zibone ^d, leziqhuli ziyahamba, abalobulephero bayahlanjululwa ^e, lezacuthe ziyezwa, abafileyo bayavuswa ^f, labayanga bayatshunyayezwa ivangeli ^g; 6 njalo ubusisiwe loba ngubani ongakhubekiyo ngami ^h.

7 Kwathi labo sebesuka uJesu waqala ukukhuluma emaxukwini ngoJohane wathi: Laphuma laya enkangala ukuyabonani ⁱ? Umhlanga onyikinywa ngumoya yini? 8 Kanti laphumela ukuyabonani? Umuntu owembethe izembatho ezibuthakathaka yini? Khangelani, abembethe ezibuthakathaka basezindlini zamakhosi. 9 Pho laphumela ukuyabonani ^j? Umprofethi yini? Yebo, ngithi kini: Loba owedlula umprofethi ^k; 10 ngoba lo nguye okulotshwe ngaye ukuthi: Khangela, mina ngiyathuma isithunywa sami phambi kobuso bakho, esizalungisa indlela yakho phambi kwakho ^l. 11 Ngiqinisile ngithi kini: Kakuvelanga phakathi kwabazelwe ngabesifazana omkhulu kuloJohane uMbhabhathizi ^m. Kodwa omncinyane embusweni wamazulu mkhulu kulaye. 12 Njalo kusukela ensukwini zikaJohane uMbhabhathizi kuze kube khathesi umbuso wamazulu uphathwa ngodlakela, labalodlakela bawuthatha ngamandla ⁿ. 13 Ngoba abaprofethi bonke lomlayo baprofetha kwaze kwaba nguJohane ^o; 14 njalo uba livuma ukukwemukela, lo unguElija obezakuza ^p. 15 Olendlebe zokuzwa, akezwe ^q.

16 Kodwa ngizasifananisa lani lesisizukulwana? Sifanana labantwana abahlezi emamakethe ^r, bememeza kubangane babo ^s, 17 besithi: Salitshayela umhlanga, kodwa kalisinanga; salililela, kodwa kalikhalanga ^t. 18 Ngoba uJohane wafika engadli ^u enganathi ^v, basebesithi: Uledimoni. 19 INdodana yomuntu yafika isidla inatha, basebesithi: Khangelani, umuntu oligovu lesinathi sewayini, umngane wabathelisi ^w lezoni ^x. Kodwa inhlakanipho ithiwa ilungile ^y ngabantwana bayo ^z.

Ukusolwa kwemizi engaphendukanga

20 Waseqala ukusola imizi okwakwenziwe phakathi kwayo ubunengi bemisebenzi yakhe yamandla, ngoba ingaphendukanga, wathi: 21 Maye kuwe, Korazini ^aa! Maye kuwe, Bhethisayida ^ab! Ngoba uba kwakwenziwe eTire leSidoni ^ac imisebenzi yamandla eyenziwe kini ^ad, ngabe kade baphenduka emasakeni ^ae lemlotheni ^af. 22 Kodwa ngithi kini: Kuzakuba ngcono ^ag eTire leSidoni ngosuku lwesigwebo kulakini ^ah. 23 Lawe, Kapenawume, ophakanyiselwe ezulwini ^ai, uzaphoselwa phansi esihogweni ^aj; ngoba uba yayenziwe eSodoma imisebenzi yamandla eyenziwe kuwe, ngabe basekhona kuze kube lamuhla ^ak. 24 Kodwa ngithi kini: Kuzakuba ngcono kulizwe leSodoma ngosuku lwesigwebo, kulakuwe ^al.

UJesu udumisa uYise; unxusa abahluphekileyo beze kuye

25 Ngalesosikhathi uJesu ^am waphendula wathi: Ngiyakubonga ^an, Baba, Nkosi yezulu lomhlaba ^ao, ngoba uzifihlile lezizinto ^ap kwabahlakaniphileyo labaqedisisayo ^aq, kodwa wazembulela izingane; 26 yebo Baba, ngoba ngokunjalo kwaba kuhle phambi kwakho ^ar. 27 Konke kwanikelwa kimi nguBaba; njalo kakho oyaziyo iNdodana, ngaphandle kukaYise; kakho futhi omaziyo uYise ngaphandle kweNdodana, njalo loba ngubani iNdodana ethanda ukumembulela ^as.

28 Wozani kimi lonke elikhatheleyo ^at lelisindiweyo, njalo mina ngizaliphumuza ^au. 29 Thathani ijogwe lami lilibeke phezu kwenu ^av lifunde kimi ^aw, ngoba ngimnene ngithobekile enhliziyweni ^ax; njalo lizathola ukuphumula emiphefumulweni yenu ^ay; 30 ngoba ijogwe lami libutshelezi, lomthwalo wami ulula ^az.